Jam 1 | DOB | STEP | Kagutoki 'omi Yaubada 'ina tomotaiyao susu tuwelo 'ediyega waesugalagalaya sena yauyaudi 'ediya. Gete 'imi leta ya'etoladinawa, Yaubada be 'Inapwana Yesu Keliso 'idi toguinuwa 'abo'agu.

James 1

Ona oboboma

1 Kagutoki 'omi Yaubada 'ina tomotaiyao susu tuwelo 'ediyega waesugalagalaya sena yauyaudi 'ediya. Gete 'imi leta ya'etoladinawa, Yaubada be 'Inapwana Yesu Keliso 'idi toguinuwa 'abo'agu.

Emisa be sinasinapu

2 Tasigwao, tuta simeemai 'ediya 'abo 'ebe toona yaudi ta wate mwaudi walobadi, manudi wada gwausowala, 3 ta wada mwalatoni 'aene gete 'ebe toona 'imi emisa manuna be 'enega wada toolopa'ala. 4 'Enega wada 'ita'i'isimi be wada toolopa'ala 'ai'aila, be gete 'enega 'imi bubuna maibo'ana 'ida bobo'ana.

5 Ta 'abo yaisigedi 'omi Yaubada 'ana mwalatoi 'ai'aila nigeya 'emiya, Yaubada 'ena wada sidasida, be 'emiya 'ida 'ebwaya, manuna tauna Totagwala ta To'ebwaya 'ai'aila. 6 Ta wada sidasida ma imi emisa 'ai'aila ta geya'abo ma imi enuwanaluwa, manuna taudi ma idi enuwanaluwa taudi nadigega lisu silasalasa bwagabwagaya, 'abo yagila 'isiyesiyeyedi.

7 Taudi wate geya'abo sinuwanuwa 'aene 'ebweu to'ase sida loba 'Inapwana 'enega, 8 manuna ma idi enuwanaluwa 'idi guinuwa yauyaudi 'ediya. 3:7,9-12; Md 7:7v6 Ais 57:20v7-8 Ye 4:8; Lu 16:13

Toesaesao be togomabesoyao.

9 Ta toekalesiyao gomagomabesodi, 'abo Yaubada 'igilagasidi, sida gwausowala sinabwana.

10 Ta wate toekalesiyao toesaesao 'ilobwenedi be sida gwausowala 'abo Yaubada 'isa'u mwa'utedi, manuna toesaesao sisasawala 'atuwa pwatula senidiyao. 11 Manuna 'abo sinala 'iaala 'ediya, 'etamo 'ina waiwaiyega senina nidi si'oapelu be sibebe'u, ta wate 'adi 'ita bobo'ana 'igugumwala. Nadigega tuga toesaesao ma'etamo sida paipaisewa ta 'idi mwawasa nigeya 'ida so'i. Lu 12:16-21

'Ebe toonayao

12 'Abo yaita 'oyo 'ebe toonayao 'ediyega 'utoolo pa'ala, 'uda gwausowala. Manuna 'amu pali bobo'ana Yaubada 'enega 'uda loba, nate yawasi ataya. Gete Yaubada 'ina onaupaupa maibo'ana 'edaya, 'abo taobobome.

13 Ta 'abo yaita 'oyo 'ebetoo nidi 'ulobadi, geya'abo 'unuwanuwa gesi be 'ugwae 'aene “Yaubada 'itootoogu.” Manuna tomota nigeya sawesawediya be Yaubada sitoo be 'aene yage to'umalidi 'ida guinuwedi, ta Yaubada wate nigeya tomota 'ida toodi be yage to'umalidi sida guinuwedi, 14 ta esi taudamo 'ida yalakwaiya 'enega nuwanuwa to'umalina 'ilisilisida. 15 Be 'ida yalakwaiya nina 'enega guinuwa to'umalina 'iapwesa, 'enega wate muliyega mwawasa 'iapwesa.

16 Kagutoki tasigwao, geya'abo 'imi nuwanuwa wasa'usa'u gesiyedi. 17 Ta wada nuwa'i'isi 'aene 'ebwayadaita bobo'adi be wate oboboma bobo'adi maibo'adi galewega simai Yaubada 'enega, tauna tuga maedanao 'adi tomweluluwa, ta wate nigeya sa'i 'ida esa'ugelasa, nadigega yauyaukwa sisa'usa'u gelasa.

18 Ga 'ina nuwanuwa tauna 'enega, ta wate 'ina ona'ai'aila 'enega, 'igimi mweluluida be 'aene 'abo'ada 'ina mwelumweluluwao maibo'adi tada loetana sinedi. 10:13v15 Lo 6:23v17 1 Yn 1:5v18 1 Pi 1:23; Yo 1:12-13

Ona 'ana nono be 'ana guinuwa

19 Tasigwao, 'ilobwenemi be ona wada enono 'ai'aila, ta geya'abo onalimana be gamwasowala 'ediya waewaiwai. 20 Manuna tomotai 'idi gamwasowala Yaubada 'ina 'eda palupaluna nigeya 'ilobwelobwene. 21 'Enega 'imi bubuna be 'imi guinuwa to'umalidi wada pilisinedi, be wada tagwalemi Yaubada 'enaya, ta wate Yaubada ona nina 'atemiya 'iasonaya wada emisei, be wada ematamatane, be 'enega 'etoseyana waloba.

22 Ta geya'abo waenono namo, nate wakabokaboemi tuga, ta esi wada guinuwa wate. 23 Manuna 'eguma yaita 'ienono namo ta geya'abo 'iguiguinuwa, tauna 'atuwa tai 'ebweu gelasi 'ena maninina 'i'itena, 24 ga muliyega 'itauya, ta tuta kukupana 'ena maninina 'ana 'ita 'inuwa pupulena.

25 Ta Yaubada 'ina loina palupaluna ga 'enega 'ida to'umalinao 'ediyega 'ili'amida. Ta 'abo yaita loina nina manuna 'inuwanuwa ta 'iguiguinuwa, ta nigeya 'ida nuwapupulaya, tauna tai nina 'ina guinuwa maibo'ana gwausowala daisinamo.

26 Ta 'eguma 'ebweu tai 'inuwanuwa gesi be 'aene tauna totapwalolo 'ai'aila, ta nigeya 'ina ona 'i'ita'ita'i'isi, 'ina tapwalolo yage besobeso. 27 Ta esi tapwalolo 'esasena be palupaluna Yaubada Tamada matanaya gete, 'aene taudi sinasinagenidi be kwabulao 'idi miyamwau 'enaya tada lemedi, ta wate geya'abo bubuna bale'u 'enega tagiegie bailida.